Khwaja Tariq Usmani
tere lahje men ye jo shiddat hai
ye koi an-kahi shikayat hai
hijr ke dukh pe yaar hairat kya
mustaqil vasl bhi aziyyat hai
tujh ko ab bhulne laga huun main
ye shikayat nahin hai tohmat hai
ḳhushbuon se bana.enge tum ko
rang se to baḌi suhulat hai
dekha jaa.e to mar chuke hain ham
saans lena to bas zarurat hai
tu mira hai to mere dard samajh
muskurana to meri aadat hai
kya kiya dard ki dava le li
mere bimar tujh pe la.anat hai
main bas us vaqt apne paas raha
jab laga aap ki zarurat hai
tere lab haa.e tere shirin lab
bosa le luun agar ijazat hai
Leave a Reply