Sahir Hoshiyarpuri
tairega faza men jo samundar na milega
dil sa bhi zamane men shanavar na milega
sahil se to andaza-e-tufan bhi hai dushvar
tah men jo na utroge to gauhar na milega
vabasta hai is bazm se hi ghar ka tasavvur
uTh ja.egi jab bazm to phir ghar na milega
parvaz ḳhalaon men mubarak tumhen lekin
ik baar bikhar kar to ye paikar na milega
sar phoḌne vaale rahen vallah salamat
kuchh din men ibadat ko bhi patthar na milega
har zarra hai firdaus-e-nazar had-e-nazar tak
bedar na hona ki ye manzar na milega
sairab jo hain un ki havas aur baḌhi hai
is bhiiḌ men pyason ko samundar na milega
tum lutf-e-mulaqat ko ḳhvabon men basa lo
ye lamha masarrat ka bichhaḌ kar na milega
har sher men iz.har se ehsas ham-aghosh
is daur men ‘sahir’ sa suḳhan-var na milega
Leave a Reply