Ramz Azimabadi
sadaf ke karb ko vo manta hai
ik ik moti ki qimat janta hai
nafasat se banata hai khilaune
pasine se jo miTTi santa hai
kahin ja.un vo mujh ko DhunD lega
mujhe mera amal pahchanta hai
mayassar hai hava-e-dasht us ko
rida-e-gard se jo chhanta hai
jo rahta hai azal ki justuju men
vo duniya men kise gardanta hai
mire qadmon se vabasta masafat
mujhe har rasta pahchanta hai
mubarak tujh ko teri be-zamiri
mujhe is jurm men kyuun santa hai
kasafat se hai tauqir-e-latafat
andhera raushni ko chhanta hai
jise hai yaad qaumon ki kahani
hava ke ruḳh ko vo pahchanta hai
azal se ‘ramz’ ye zeb-e-nazar hai
kahin salma kahin vo kanta hai
Leave a Reply