lamha lamha mira har ik se siva jagta hai
main alag jagta huun dard juda jagta hai
baḳht bhi sote hain aur ghar ke makin bhi lekin
sarhad-e-shab pe kahin ek diya jagta hai
ḳhvab ho jaane se pahle koi harf-e-ḳhush-kam
isi ummid pe ye zehn-e-rasa jagta hai
ham pe hi ḳhaas hain kuchh us ki inayat so ab
fitna is shahr men har roz naya jagta hai
ai mire dard bata had se guzarna kab hai
tu jo yuun jagta rahta hai to kya jagta hai
Leave a Reply