Poet
mushkil hai ki pahlu se juda dil nahin hota
aur mere satane se vo ghafil nahin hota
parde men agar us ke mira dil nahin hota
aina rukh-e-yar ke qabil nahin hota
jab qasd musammam hai to har kaar hai asan
jo kaam ki mushkil hai vo mushkil nahin hota
gar parda-nashini tujhe manzur thi dilbar
dil mera tire vaste mahmil nahin hota
mai-khana ko jaata huun ye takrar abas hai
naseh to kisi taur se qaail nahin hota
saffak kaha main unhen hans ke vo bole
har sahab-e-shamshir to qatil nahin hota
didar-talab ka talib hai use jalva dikha de
ashiq tu zar-o-mal ka saail nahin hota
vo nur-e-mubin jo ki tajalli-e-laqa hai
us ka ba-juz aadam koi hamil nahin hota
mera to pata khaak bhi rahta na ‘jamila’
gar fazl-e-ilahi mire shamil nahin hota
Leave a Reply