Kafeel Aazar Amrohvi
mujh se ab tak ye gila hai mire gham-ḳhvaron ko
kyuun chhua main ne tiri yaad ke angaron ko
zehn o dil hashr ke suraj ki tarah jalte hain
jab se chhoḌa hai tire shahr ki divaron ko
aaj bhi aap ki yadon ke muqaddas jhonke
chheḌ jaate hain mohabbat ke gunahgaron ko
aarzu soch taḌap dard kasak gham aansu
ham se kya kya na mila hijr ke bazaron ko
tere jalte hue honTon ki hararat na mili
meri tanha.i ke bhige hue ruḳhsaron ko
tum ko mahaul se ho ja.egi nafrat ‘azar’
itne nazdik se dekha na karo yaron ko
Leave a Reply