jitni achchhi baten hain
saari teri baten hain
jin men tera zikr nahin
vo bhi koi baten hain
jo chuTki men kahte ho
sochi samjhi baten hain
tera mera koi nahin
teri meri baten hain
divaron ke honTon par
TuuTi phuTi baten hain
jitna pyara chehra hai
utni pyari baten hain
naya naya to dikhta huun
vahi purani baten hain
ik anjane number par
ḳhamoshi hi baten hain
sheron se tum duur raho
chikni chupḌi baten hain
jinhen mukammal jaana tha
vahi adhuri baten hain
un ke rang bhi hote hain
ye jo niili baten hain
Leave a Reply