Shadan Indauri
raah men haa.il na ho jaate agar dair-o-haram
aur shayad duur tak milte tire naqsh-e-qadam
ishq men farq-e-maratib ko kabhi bhule na ham
apni ḳhatir ah-o-zari un ki ḳhatir zabt-e-gham
jab bhi haath aa.i ba-qadr-e-zarf hi sabit hui
pi ke dekhi hai ziyada se ziyada kam se kam
kar liya hai main ne har ik hadse ka tajziya
muskurane se masarrat ban gaya rone se gham
azma.ish par utar aaya hai daur-e-inqilab
dhuup ban kar rah gaya hai saya-e-dair-o-haram
muddaton parvane ki manind jal chukne ke ba.ad
sham.a ban kar jal rahe hain ab tiri mahfil men ham
Leave a Reply