Arsh Siddiqui
ankhon men kahin us ki bhi tufan to nahin tha
vo mujh se juda ho ke pasheman to nahin tha
kyuun us ne na ki mujh se sar-e-bazm koi baat
main sang-e-malamat se gurezan to nahin tha
kyuun rasta dekha kiya us ka main sar-e-sham
be-dard ka mujh se koi paiman to nahin tha
thi aag bhi teri hi tarah hosh ki dushman
varna mujhe jal marne ka arman to nahin tha
tha dil bhi kabhi shahr-e-tamanna men mumasil
ye qarya hamesha se bayaban to nahin tha
kyuun us ne mujhe azmat-e-qur.an ki qasam di
vo rahzan-e-iman musalman to nahin tha
kyuun mujh se tavaqqo.a thi use jah-o-hasham ki
main banda-e-nadar sulaiman to nahin tha
tufan-e-alam kyuun mujhe sahil pe utara
main shor-e-talatum se hirasan to nahin tha
shab-bhar miri palkon men damakte rahe taare
kal raat yahan jashn-e-charaghan to nahin tha
kahte hain ki hai ‘arsh’ nigun pa-e-nabi par
aisa vo koi sahab-e-iman to nahin tha
Leave a Reply