Har Dam Duaen Dena Har Lahza Aahen Bharna

har dam duaen dena har lahza aahen bharna

un ka bhi kaam karna apna bhi kaam karna

haan kis ko hai mayassar ye kaam kar guzarna

ik bankpan se jiina ik bankpan se marna

jo ziist ko na samjhen jo maut ko na janen

jiina unhin ka jiina marna unhin ka marna

teri inayaton se mujh ko bhi aa chala hai

teri himayaton men har har qadam guzarna

sahil ke lab se puchho dariya ke dil se puchho

ik mauj-e-tah-nashin ka muddat ke baad ubharna

ai shauq tere sadqe pahuncha diya kahan tak

ai ishq tere qurban jiina hai ab na marna

har zarra aah jis ka labrez-e-tishnagi hai

us khaak ki bhi janib ai abr-e-tar guzarna

dariya ki zindagi par sadqe hazar janen

mujh ko nahin gavara sahil ki maut marna

ranginiyan nahin to ranaiyan bhi kaisi

shabnam si naznin ko aata nahin sanvarna

ashkon ko bhi ye jurat allah ri teri qudrat

ankhon tak aate aate phir dil men ja thaharna

ai jan-e-naz aa ja ankhon ki raah dil men

in khushk naddiyon se mushkil ho kiya guzarna

ham be-khudan-e-gham se ye raaz koi sikhe

jiina magar na jiina marna magar na marna

kuchh aa chali hai aahat us pa-e-naz ki si

tujh par khuda ki rahmat ai dil zara thaharna

khun-e-jigar ka hasil ik sher-e-tar ki surat

apna hi aks jis men apna hai rang bharna

Leave a Comment