barabar ḳhvab se chehron ki hijrat dekhte rahna
guzar chukne pe bhi vo sham-e-rahlat dekhte rahna
dhanak ki barishen barfab shahron par nahin hotin
yahan phulon ka rasta umr bhar mat dekhte rahna
kitabon ki tahon men DhunDhna na-dida ashya ka
palaT kar phir koi ḳhali ibarat dekhte rahna
hujum-e-shahr ke sannaTe men gum-sum vo Tiila sa
usi ko aate jaate be-zarurat dekhte rahna
jise main chhu nahin sakta dikha.i kyuun vo deta hai
farishton jaisi bas meri ibadat dekhte rahna
‘musavvir’ kuchh na kahne ka ye dukh bhi saḳht zalim hai
talab kar legi lafzon ki adalat dekhte rahna
Leave a Reply