sarshar huun saaqi ki ankhon ke tasavvur se
hai koi gharaz mujh ko baada se na saghar se
is daur men maikhane ka nazm nirala hai
pi kar koi bahke ham ik jura ko bhi tarse
kitne hain jo ik qatra se pyaas bujhate hain
sairab nahin hote kuchh log samundar se
hushiyar bahut rahna hai aaj ke raahi ko
jitna nahin rahzan se dar utna hai rahbar se
jurat ke dhani jo hain mai-khana hi un ka hai
jurat na ho jis men vo ik jaam ko bhi tarse
us dil ko samajhna kuchh asan nahin pyare
ye sakht hai patthar se nazuk hai gul-e-tar se
socha tha na paimana ab munh se lagaunga
kya khair ho tauba ki jab ghir ke ghata barse
un se koi kah de vo khud apna muqaddar hain
jo log gila karte hain apne muqaddar se
Leave a Reply