Abr Sarka Chand Ki Chehra-Numai Ho Gai

Saleem Shahid

abr sarka chand ki chehra-numa.i ho ga.i

ik jhalak dekha use aur ashna.i ho ga.i

so gaya to ḳhvab apne ghar men le aa.e mujhe

jaise meri vaqt se pahle riha.i ho ga.i

mere kamre men koi tasvir pahle to na thi

us ko dekha saade kaghaz par chhapa.i ho ga.i

main khuli chhat se utar aaya bhare bazar men

samne khiḌki ki raunaq jab para.i ho ga.i

uḌ rahi hai har taraf suraj ke angare ki raakh

bujh gaya din jal ke ḳhakistar ḳhuda.i ho ga.i

kaash jite-ji shajar saa.e men le leta mujhe

vasl ke mausam se pahle hi juda.i ho ga.i

bah chuke aansu to chashm-e-sabz ka rang uḌ gaya

rafta rafta zard is dariya ki kaa.i ho ga.i

ho ga.i ‘shahid’ vo chashm-e-sang paani kya hua

kis tarah naḳhun se patthar par khuda.i ho ga.i