irfan-o-agahi ke saza-var ham hue
soya paḌa tha shahr ki bedar ham hue
ta umr intizar sahi par ba-roz-e-hashr
achchha hua ki tere talabgar ham hue
ham par vafa-e-ahd anal-haq bhi farz tha
is vaste ki mahram-e-asrar ham hue
Thahregi ek din vahi meraj-e-bandagi
jo baat kah ke aaj gunahgar ham hue
hote ga.e vo ḳhalq-farebi men hoshiyar
jitna ki tajribe se samajhdar ham hue
nadan the ki masnad-e-irshad chhoḌ kar
halqa-ba-gosh-e-sirat-o-kirdar ham hue
is daur-e-ḳhud-farosh men ‘aḳhtar’ ba-sad ḳhulus
ḳhamyaza-sanj-e-jur.at-e-iz.har ham hue
Leave a Reply