shabnam-shakeel

mausam ke pas koi Khabar moatabar bhi ho

mausam ke paas koi khabar mo’atabar bhi ho

mauj-e-hava ke saath tira nama-bar bhi ho

sun lega teri chaap to dhadkega der tak

laakh apne gird-o-pesh se dil be-khabar bhi ho

arzan se log bhagte us ko to gham nahin

lazim nahin ki husn men husn-e-nazar bhi ho

barson se jis makan men meri bud-o-bash hai

ab kya ye lazmi hai vahi mera ghar bhi ho

sustae jis ke saae men har aarzu miri

is dil ke sahn men koi aisa shajar bhi ho

shah-rah-e-raushni pe chala hai jo mere saath

tarik raston men mira ham-safar bhi ho

kitne hi phuul chehre dhuan ban ke rah gae

is sanehe se kaash koi ba-khabar bhi ho

us ke liye to daav pe khud ko laga den ham

tadbir vo batao ki jo kargar bhi ho

jaage hue gulon hi se ‘shabnam’ ko pyaar hai

mumkin hai koi shai tire zer-e-asar bhi ho

More Poems

Leave a Comment