Dil Ke Bhule Hue Afsane Bahut Yaad Aae

Tanveer Ahmad Alvi

dil ke bhule hue afsane bahut yaad aa.e

zindagi tere sanam-ḳhane bahut yaad aa.e

kuza-e-dil ki tarah pahle unhen toḌ diya

ab vo TuuTe hue paimane bahut yaad aa.e

vo jo ghairon ki salibon ko uTha laa.e the

ḳhud masiha ko vo divane bahut yaad aa.e

jism-o-jan ke ye sanam-zad ilahi tauba

dil ke ujḌe hue but-ḳhane bahut yaad aa.e

maut ka raqs hai afsurdagi-e-jan ka ilaaj

jal bujhi sham.a to parvane bahut yaad aa.e

dil ke zaḳhmon ke bhala kis ko mayassar hain charagh

ashk-dar-ashk vo nazrane bahut yaad aa.e

dekh kar shahr-e-ḳhirad ki ye kashakash ‘tanvir’

dasht-e-ehsas ke virane bahut yaad aa.e