Jaikrishn Chaudhry Habeeb
nazren jhuki saval pe mere javab men
kya kya na kah ga.i hai nigahen hijab men
mizrab hi se saaz men hai saari naghmagi
hai zindagi ka lutf nihan iztirab men
rah-e-vafa men us ke qadam Dagmaga.en kyon
dekha hai jis ne tera karam bhi itaab men
sadqe nigah-e-naz ke huun be-niyaz-e-jam
aa.e ye kaif-e-husn kahan se sharab men
main rah-navard-e-shauq huun mujh ko kahan ye hosh
rahat men guzre dil ki ye guzre azaab men
rah rah ke ab rulati hai piiri men un ki yaad
hans hans ke zaḳhm khaa.e jo ham ne shabab men
ye tazgi ye rang bhi aaya kahan se hai
kanTon ka ḳhuun hi to hai shayad gulab men
puure kahan hue mire arman gunah ke
kya ḳhaak dil lagega abhi se savab men
bedariyon ki taab na ham la sake ‘habib’
guzri hayat ek musalsal se ḳhvab men
Leave a Reply