Saleem Siddiqui
tujh ko paane ke liye ḳhud se guzar tak ja.un
aisi jiine ki tamanna hai ki mar tak ja.un
ab na shishon pe girun aur na shajar tak ja.un
main huun patthar to kisi dast-e-hunar tak ja.un
ik dhundlaka huun zara der men chhaT ja.unga
main koi raat nahin huun jo sahar tak ja.un
jis ke qadmon ke qasidon se hi fursat na mile
kaise us shaḳhs ki ta.azim-e-nazar tak ja.un
ghar ne sahra men mujhe chhoḌ diya tha la kar
ab ho sahra ki ijazat to main ghar tak ja.un
apne mazlum labon par jo vo rakh le mujh ko
aah ban kar main duaon ke asar tak ja.un
ai miri raah koi raah dikha de mujh ko
dhuup oḌhun ki tah-e-shaḳh-e-shajar tak ja.un
Leave a Reply