Poet
tere baa.is mas.ala hal ho gaya
main adhura tha mukammal ho gaya
jaan di us ne main pagal ho gaya
aur afsana mukammal ho gaya
mujh ko le kar rail aage baḌh ga.i
aur giila us ka anchal ho gaya
ye samundar kis qadar tha pur-sukun
chand ko dekha to pagal ho gaya
ab miri achha.iyan bhi aib hain
ab mira sona bhi pital ho gaya
har taraf hangama-ha-e-dar-o-gir
kya ye saara shahr pagal ho gaya
zehn men utri thi yadon ki barat
raat phir jangal men mangal ho gaya
ek afsana adhura hai abhi
ek afsana mukammal ho gaya
ḳhushk dariyaon men ḳhaak uḌne lagi
aur sahraon men jal-thal ho gaya
Leave a Reply