Raat Kitni Raushan Hai Kuchh Likha-paDhi Kar Len Aao Phir Ghazal Kah Len

Moni Gopal Tapish

raat kitni raushan hai kuchh likha-paḌhi kar len aao phir ghazal kah len

chandni ke manzar men do ghaḌi zara dahken aao phir ghazal kah len

in andheri raton ke ḳhaufnak sayon se bach ke sub.h tak ji len

zahr dhuup ka chakh kar maut ko ziya baḳhshen aao phir ghazal kah len

vo ki ek chehra hai ya kitab ya dariya ya koi samundar hai

nim-baz ankhon men us ki jhank kar dekhen aao phir ghazal kah len

chandni ka ras piine duur tak nikal jaa.en bhuul jaa.en duniya ko

khurduri si saḌkon par der tak yunhi ghumen aao phir ghazal kah len

jan-nashin se dushman tak saare rishte naton ko phenk den samundar men

lahr lahr bedari ki hasin rida oḌhen aao phir ghazal kah len

dardnak chehron par muskurahaTen oḌhe ḳhud ko ja-ba-ja bechen

ham ‘tapish’ tumhen guzra vaqt maan kar sochen aao phir ghazal kah len