tahlil mausamon men kar ke ajab nasha sa
phaila hua hai har-su kuchh din se rat-jaga sa
milte hain roz un se hasrat ki sarhadon par
rahta hai phir bhi haa.il kyuun jaane fasla sa
barson ke sab marasim toḌe hain us ne aise
pal bhar men TuuT jaa.e jis tarah aa.ina sa
taaza rafaqaton ke pur-kaif silsilon men
rahta hai dil na jaane ab kyuun Dara Dara sa
meri bala se chahat ki laakh barishen hon
main pahle bhi tha pyasa main aaj bhi huun pyasa
donon men aaj tak vo pahli si tishnagi hai
phir vasl men nahin kyuun vo lutf ibtida sa
tanha.iyon ki zad men rahti hai ruuh meri
is vaste huun yaaro main aaj kal bujha sa
Takra ga.e jo un se ham raah men achanak
ik dastan hui phir vo hadisa zara sa
jis par nigah Thahri jan-e-‘ḳhayal’ apni
vo ajnabi hai lekin lagta hai ashna sa
Leave a Reply