dard hi dard thi minnat-kash-e-darman to na thi
zindagi ḳhvab to thi ḳhvab-e-pareshan to na thi
jab hava le ke chali thi tire kuche ki taraf
miri janib nigaran gardish-e-dauran to na thi
zindagi shahr-e-ghazalan men bagulon ki tarah
mujh se pahle miri avaz pe raqsan to na thi
har-nafas saath rahi hai mire saa.e ki tarah
aap ki yaad miri umr-e-gurezan to na thi
dil dhaḌakta hai to halat badal jaate hain
raat tak koi kali chak-gareban to na thi
tu ne duzdida-nigahon se jise dekha tha
teri tasvir thi tasvir-e-gulistan to na thi
ḳhvab sharminda-e-ta.abir ka.i the ‘nashtar’
zindagi arsa-gah-e-ḳhvab-e-ghazalan to na thi
Leave a Reply