Mere Badan Mein Lahu Ka Kataw Aisa Tha

mire badan men lahu ka katav aisa tha

ki mera har-bun-e-mu ek ghaav aisa tha

bichhadte vaqt ajab uljhanon men Daal gaya

vo ek shakhs ki sidhe subhav aisa tha

chali jo baat koi raat ke taaqub men

to baat baat se nikli bahav aisa tha

main puura puura ravana tha abjadon ki taraf

hisab-e-umr tira chal-chalav aisa tha

gul-e-nashat ki khushbu bhi baar thi mujh ko

mire mizaj men gham ka rachav aisa tha

kanar-e-lab men na rahti thi mauj-e-goyai

tabiaton men sukhan ka bahav aisa tha

thaharta kya miri khakistari nigahon men

tira vajud to raushan alaav aisa tha

nikal saki na koi bhi farar ki surat

sipah-e-zist ka mujh par padav aisa tha

na chaah kar bhi use dil se chahte the ham

kisi ki laag men ‘tabish’ lagav aisa tha

Leave a Comment