Poet
tumhare paikar se phuTne vaali raushni meri raah men hai
ye fasla is liye gavara ki ik haqiqat nigah men hai
fasil-e-gham gir ga.i to kis se lipaT ke ro.enge shahr-e-yaran
ye soch kar jhuum uTha huun yaaro ki gham ḳhud apni panah men hai
main zindagi taj ke aa raha huun isi liye muskura raha huun
zara batao ki kis liye ab kaji tumhari kulah men hai
tumhare baghon se duur viran regzaron men gul khile hain
shafaq ufuq ke hisar men hai shaguftagi shahrah men hai
nadi nadi be-karan ḳhamoshi shajar shajar sogvar saa.e
ye raat bimar ho ga.i hai ki mubtala phir gunah men hai
udaas yadon ne bab-e-afkar par ka.i baar dastaken diin
magar qalam hai ki gul-fishan bint-e-shab ki aram-gah men hai
koi qalandar hai koi darvesh koi vahshi hai koi ‘rahi’
har ek shorida-sar bara.e-sahar tiri ḳhanqah men hai
Leave a Reply