aaj mujh ko bhi mire ahbab dhoka de ga.e
main tavana shaḳhs tha a.asab dhoka de ga.e
gaanv ki kuchh laḌkiyan apne ghaḌe bharne ga.iin
ḳhushk tha paani vahan talab dhoka de ga.e
jo nazar aate the aksar un jabinon par tujhe
kya karen mathe ke vo mehrab dhoka de ga.e
apne hathon se khilata tha magar vo uḌ ga.e
aaj mujh ko vo mire surḳhab dhoka de ga.e
main muafi chahta huun mujh se ghalati ho ga.i
kuchh bhi mushkil tha nahin eraab dhoka de ga.e
aaj se main hijr kaTunga tasalli se ‘sahar’
jo kabhi dekhe the main ne ḳhvab dhoka de ga.e
Leave a Reply