poet

Aankhon Ko Ab Nigah Ki Aadat Nahin Rahi

ankhon ko ab nigah ki aadat nahin rahi

ab kuchh bhi dekhne ki zarurat nahin rahi

sachchaiyon ki raah bahut ho gai kathin

is raste pe chalne ki himmat nahin rahi

dushman ho dost ho koi apna ki ghair ho

ham ko to ab kisi ki bhi hajat nahin rahi

duniya aziz-tar rahi ik arsa-e-daraz

lekin ab is ki bhi to mohabbat nahin rahi

arsa hua kisi ne pukara nahin mujhe

shayad kisi ko meri zarurat nahin rahi

kanta sa ek dil men khatakta hai mustaqil

par dil ki baat kahne ki aadat nahin rahi

sarmaya-e-hayat hua chahta hai khatm

jis par ghurur tha vahi daulat nahin rahi

‘bushra’ kabhi jo jaao vahan arz-e-hal ko

kahna ki ham pe ab vo inayat nahin rahi

More Poems

Leave a Comment