Shahar Mein Rang Hai Na KHushbu Hai

shahar meñ rañg hai na ḳhushbū hai

phir bhī charchā usī kā har-sū hai

bah rahā hai muhīb sannāTā

pā-ba-gil sabza-e-lab-e-jū hai

ghup añdhere kā jal rahā hai charāġh

raushnī kā ajiib jaadū hai

be-dilī hai nasīb-e-dām-e-ḳhayāl

aarzū ik ramīda aahū hai

sīna-e-sañg par TheThurtā huā

shāḳh-e-gul kā gudāz pahlū hai

shiddat-e-karb se niDhāl nahīñ

aañkh meñ jam gayā jo aañsū hai

ek zarra nahīñ jo mil jaa.e

aur bapā mahshar-e-tagāpū hai

dard ne baḌh ke āshkār kiyā

maut par zindagī kā qaabū hai

mujh ko dekheñ ‘nazar’ jo kahte haiñ

ādmī, aadmī kā daarū hai

Leave a Comment