Shahid Jamal
ghar ho ya bahar vahi kaḌvi kasili guftugu
kab talak sunte rahen ham ek jaisi guftugu
chand lamhon men bhaTak jaa.e jo mauzuat se
be-sabab vo kyuun kiya karta hai ilmi guftugu
us ke lahje men to halki si nadamat bhi nahin
ik taraf ham bhuul jaa.en pichhli saari guftugu
pal men ratti pal men masha pal men raa.i ka pahaḌ
pak chuke hain kaan sun sun kar siyasi guftugu
ghar kya baiTha hai dil men aaj tak ik ek lafz
kya musibat ban ga.i do-char pal ki guftugu
ab koi apna.e chahe mustarad kar de mujhe
main ghazal men kar nahin pa.unga nangi guftugu
achchhe-ḳhase log uTh jaate hain mahfil chhoḌ kar
jab kabhi hoti hai kuchh logon men adabi guftugu
Leave a Reply