Sultan Rashk
baḌi dana.i se andaz-e-ayyari badalte hain
badalte mausamon men jo vafadari badalte hain
girani ho ki arzani unhen to mil hi jaate hain
zarurat jab bhi hoti hai vo darbari badalte hain
zarurat aise ahl-e-dil ki hai ab mere logon ko
jo tartib-e-rumuz-e-zindagi saari badalte hain
ta.alluq kya faqiran-e-haram ka shahryaron se
ham aise log kab apni vafadari badalte hain
asir-e-maslahat ḳhud ho ga.e vo jo ye kahte the
purani maslahat hain suraten saari badalte hain
chalo ik baar phir dar-o-rasan ki azma.ish ho
chalo ik baar phir rasm-e-sitam-gari badalte hain
Leave a Reply