Farasat Rizwi
ga.e dinon ka havala tha kaam kya deta
guzar gaya vo javab-e-salam kya deta
dayar-e-shab se bhi aage mira safar tha bahut
so mera saath vo mah-e-tamam kya deta
main is ḳharaba-e-dil ke ujaaḌ manzar men
kisi ko davat-e-sair-o-qayam kya deta
jo tu na aata to rang-e-fasurdagi ke siva
miri nigah ko ye husn-e-sham kya deta
shikasta-pa.i pe jab mutma.in the rahravan
main qafile ko dua-e-ḳhiram kya deta
mujhe ḳhabar hai sarisht-e-sifal men hai zaval
main apne dil ko fareb-e-davam kya deta
main kuza-gar ki dukan par rakha raha ta-umr
koi charagh-e-shikasta ke daam kya deta
usi se mujh ko mohabbat usi se nafrat bhi
main us ta.alluq-e-ḳhatir ko naam kya deta
ye shahr ho gaya ḳhali suḳhan-shanason se
yahan koi mujhe dad-e-kalam kya deta
Leave a Reply