Aqeel Nomani
ik nigah us janib thoḌi duur paani par
tairte hain kuchh lashe phir huzur paani par
kashtiyan fana kar ke ja chhupe kahin tufan
jaan phenke jaate hain be-qusur paani par
mujh ko tishna-kami ne fath-yabiyan baḳhshin
aur mere dushman ko tha ghurur paani par
anginat safinon men diip jagmagate hain
raat ne luTaya hai rang-o-nur paani par
jis ko aḳhir-e-shab ka ham-safar bataya hai
dekhiye vo farma.e kab zuhur paani par
yuun ‘aqil’ bikhri hain aftab ki kirnen
jaise hon kuchh a.ine chur-chur paani par
Leave a Reply