Abdussamad Tapish
dekh kar meri ana kis darja hairani men hai
us ne samjha tha ki sab kuchh bab-e-imkani men hai
mujh ko gham de de ke khush tha vo magar ye kya hua
vaqt ke hathon vahi gham ki faravani men hai
kis ko kis ko khush rakhe vo kis se jhagda mol le
faisla hai us ke hathon men to hairani men hai
har ghadi ab hasraton ki laash deti hai dhuan
ik ajab shamshan mere dil ki virani men hai
main bhi tanha is taraf huun vo bhi tanha us taraf
main pareshan huun to huun vo bhi pareshani men hai
barf bhi simab bhi sahil bhi hai girdab bhi
ye tazad-e-khasiyat ik shakl-e-insani men hai
Leave a Reply