dil ko harif-e-naz kiye ja raha huun main
har shai se be-niyaz kiye ja raha huun main
shukr-e-nigah-e-naz kiye ja raha huun main
fitrat ko karsaz kiye ja raha huun main
hai justuju-e-sirr-e-haqiqat-ravan-faroz
rah-e-talab daraz kiye ja raha huun main
duniya ko de raha huun sabaq husn-o-ishq ka
ifsha har ek raaz kiye ja raha huun main
hoga kabhi to husn-e-haqiqat nazar-navaz
nazzara-e-majaz kiye ja raha huun main
nakami-e-umid se ghabra na jaa.e dil
qismat par apni naaz kiye ja raha huun main
mahrum rah na jaa.e koi tishna-kam ‘raz’
arzan sharab-e-raz kiye ja raha huun main
Leave a Reply