ahmad-ali-barqi-azmi

Takhta-e-Mashq-e-Sitam Mujhko Banane Wala

takhta-e-mashq-e-sitam mujh ko banane vaala

tha vahi roz mire khvab men aane vaala

muntashir kar diya shiraza-e-hasti jis ne

khana-e-dil ko mire tha vo sajane vaala

roz karta raha vo vada-e-farda mujh se

umr bhar ahd-e-vafa tha jo nibhane vaala

us ne manjdhar men kashti ko miri chhod diya

tha jo tufan-e-havadis se bachane vaala

pahle karta tha pas-e-parda miri bekh-kuni

kamyabi ka miri jashn manane vaala

sabiqa jis se pada maslahat-andesh tha vo

”dost hota nahin har haath milane vala”

maar Daale na ye tanhai ka ehsas mujhe

muntazir jis ka tha ab vo nahin aane vaala

jis se dil-jui ki ummid thi nikla vo raqib

jis ko dekho hai vahi mujh ko satane vaala

aish-o-ishrat ke sada khvab dikhata tha use

ghamza-o-naz se ‘barqi’ ko lubhane vaala

More Poems

Leave a Comment