Arif Imam
mujhe mujh se milati ja rahi hai
faqiri raas aati ja rahi hai
ye miTTi mere ḳhal-o-ḳhad chura kar
tira chehra banati ja rahi hai
ye kis ki yaad hai jo mere dil men
musalle se bichhati ja rahi hai
ajab shai hai suḳhan ki sar-bulandi
mire sar ko jhukati ja rahi hai
jo masti raqs men rakhti thi mujh ko
vo sajdon men rulati ja rahi hai
lahu bahne laga hai eḌiyon tak
ibadat rang laati ja rahi hai
Leave a Reply