kahīñ shab-ḳhūñ kā andesha nahīñ hai
ye āġhāz-e-safar achchhā nahīñ hai
tilism-e-ḳhāmushī TuuTā nahīñ hai
magar maqtal sā sannāTā nahīñ hai
ḳhizāñ ke lauT jaane kā hai ḳhadsha
chaman dil kā abhī ujḌā nahīñ hai
jo gard-e-rāh meñ manzil na dekhe
koī sāhab-nazar aisā nahīñ hai
har ik shāḳh-e-shajar se dukh na barse
abhī vo marhala aayā nahīñ hai
samundar tīrgī kā darmiyāñ hai
sahar kā qāfila bhaTkā nahīñ hai
sitāra chhup gayā hai bādaloñ meñ
musāfir rāsta bhūlā nahīñ hai