ghairon se mil ke hi sahi be-bak to hua
baare vo shokh pahle se chalak to hua
ji khush hua hai girte makanon ko dekh kar
ye shahr khauf-e-khud se jigar-chak to hua
ye to hua ki aadmi pahuncha hai maah tak
kuchh bhi hua vo vaqif-e-aflak to hua
kuchh aur vo hua na hua mujh ko dekh kar
yad-e-bahar-e-husn se ghamnak to hua
is kashmakash men ham bhi thake to hain ai ‘munir’
shahr-e-khuda sitam se magar paak to hua
Leave a Reply