is vaste vo qabil-e-dastar nahin tha
vo shaḳhs kisi shahr ka sardar nahin tha
manzar ye miri aankh ne dekhe hain lagatar
divar to thi saya-e-divar nahin tha
patthar tha mohabbat ko nahin jaan saka vo
vo shaḳhs to hargiz mira dildar nahin tha
jaana hai hamen lauT ke hargiz nahin rukna
kya ham ne bataya tumhen sau baar nahin tha
halat hi aise the bane hijr ke qaidi
chahat se magar aap ki inkar nahin tha
main ḳhana-ba-doshon ki tarah ghuum rahi thi
duniya men kisi se bhi mujhe pyaar nahin tha
aati hi nahin us ko miri yaad bhi ‘zebi’
rasta to mire gaanv ka dushvar nahin tha
Leave a Reply