kisi ka naam lo be-nam afsane bahut se hain
na jaane kis ko tum kahte ho divane bahut se hain
jafaon ke gale tum se ḳhuda jaane bahut se hain
magar mahshar ka din hai apne begane bahut se hain
bana.e de rahi hain ajnabi nadariyan mujh ko
tiri mahfil men varna jane-pahchane bahut se hain
dhari rah ja.egi pabandi-e-zindan jo ab chheḌa
ye darbanon ko samjha do ki divane bahut se hain
bas ab so jaao niind ankhon men hai kal phir suna.enge
zara si rah ga.i hai raat afsane bahut se hain
tumhen kis ne bulaya mai-kashon se ye na kah saaqi
tabi.at mil ga.i hai varna maiḳhane bahut se hain
baḌi qurbaniyon ke ba.ad rahna baagh men hoga
abhi to ashiyan bijli se jalvane bahut se hain
likhi hai ḳhaak uḌani hi agar apne muqaddar men
tire kuche pe kya mauquf virane bahut se hain
na ro ai sham.a maujuda patangon ki musibat par
abhi mahfil se bahar tere parvane bahut se hain
mire kahne se hogi tark-e-rasm-o-rah ghairon se
baja hai aap ne kahne mire maane bahut se hain
‘qamar’ allah saath iman ke manzil pe pahuncha de
haram ki raah men sunte hain but-ḳhane bahut se hain
Leave a Reply