Hum To Khush The Ki Chalo Dil Ka Junun Kuchh Kam Hai

ham to khush the ki chalo dil ka junun kuchh kam hai

ab jo aram bahut hai to sukun kuchh kam hai

rang-e-girya ne dikhai nahin agli si bahar

ab ke lagta hai ki amezish-e-khun kuchh kam hai

ab tira hijr musalsal hai to ye bhed khula

gham-e-dil se gham-e-duniya ka fusun kuchh kam hai

us ne dukh saare zamane ka mujhe bakhsh diya

phir bhi lalach ka taqaza hai kahun kuchh kam hai

rah-e-dunya se nahin dil ki guzargah se aa

fasla garche ziyada hai pe yuun kuchh kam hai

tu ne dekha hi nahin mujh ko bhale vaqton men

ye kharabi ki main jis haal men huun kuchh kam hai

aag hi aag mire qarya-e-tan men hai ‘faraz’

phir bhi lagta hai abhi soz-e-darun kuchh kam hai

Leave a Comment