ik danish-e-nurani ik danish-e-burhani
hai danish-e-burhani hairat ki faravani
is paikar-e-ḳhaki men ik shai hai so vo teri
mere liye mushkil hai is shai ki nigahbani
ab kya jo fughan meri pahunchi hai sitaron tak
tu ne hi sikhai thi mujh ko ye ghazal-ḳhvani
ho naqsh agar batil takrar se kya hasil
kya tujh ko ḳhush aati hai aadam ki ye arzani
mujh ko to sikha di hai afrang ne zindiqi
is daur ke mulla hain kyuun nang-e-musalmani
taqdir shikan quvvat baaqi hai abhi is men
nadan jise kahte hain taqdir ka zindani
tere bhi sanam-ḳhane mere bhi sanam-ḳhane
donon ke sanam ḳhaki donon ke sanam faani