Mohammad Izhar Ul Haq
ḳhizan tujh par ye kaisa barg-o-bar aane laga hai
mujhe ab mausamon par e’tibar aane laga hai
kahan dopahr ki hiddat kahan ThanDak shafaq ki
siyah resham men chandi ka ghubar aane laga hai
khulenge vasl ke dar dusri duniyaon men bhi
bil-aḳhir hijr ke ruḳh par nikhar aane laga hai
mire asbab men mashkiza-o-ḳhurjin rakhna
safar ki shaam hai aur regzar aane laga hai
falak ko baar baar ahl-e-zamin yuun dekhte hain
ki jaise ghaib se koi savar aane laga hai
Leave a Reply