su-e-mai-kada na jaate to kuchh aur baat hoti
vo nigah se pilate to kuchh aur baat hoti
go hava-e-gulsitan ne mire dil ki laaj rakh li
vo naqab khud uthate to kuchh aur baat hoti
ye baja kali ne khil kar kiya gulsitan moattar
agar aap muskurate to kuchh aur baat hoti
ye khule khule se gesu inhen laakh tu sanvare
mire haath se sanvarte to kuchh aur baat hoti
go haram ke raste se vo pahunch gae khuda tak
tiri rahguzar se jaate to kuchh aur baat hoti
Leave a Reply