Dil Mein Kisi Ke Rah Kiye Ja Raha Hun Main

dil men kisi ke raah kiye ja raha huun main

kitna hasin gunah kiye ja raha huun main

duniya-e-dil tabah kiye ja raha huun main

sarf-e-nigah-o-ah kiye ja raha huun main

fard-e-amal siyah kiye ja raha huun main

rahmat ko be-panah kiye ja raha huun main

aisi bhi ik nigah kiye ja raha huun main

zarron ko mehr-o-mah kiye ja raha huun main

mujh se lage hain ishq ki azmat ko chaar chand

khud husn ko gavah kiye ja raha huun main

daftar hai ek mani-e-be-lafz-o-saut ka

saada si jo nigah kiye ja raha huun main

aage qadam badhaen jinhen sujhta nahin

raushan charagh-e-rah kiye ja raha huun main

masumi-e-jamal ko bhi jin pe rashk hai

aise bhi kuchh gunah kiye ja raha huun main

tanqid-e-husn maslahat-e-khas-e-ishq hai

ye jurm gaah gaah kiye ja raha huun main

uthti nahin hai aankh magar us ke ru-ba-ru

nadida ik nigah kiye ja raha huun main

gulshan-parast huun mujhe gul hi nahin aziiz

kanton se bhi nibah kiye ja raha huun main

yuun zindagi guzar raha huun tire baghair

jaise koi gunah kiye ja raha huun main

mujh se ada hua hai ‘jigar’ justuju ka haq

har zarre ko gavah kiye ja raha huun main

Leave a Comment