Meer Asar
sarf-e-gham ham ne naujavani ki
vaah kya ḳhuub zindagani ki
apni biiti agar main tujh se kahun
baat nibḌe na is kahani ki
tere daghon ki ai gham-e-ulfat
ḳhuub ham ne bhi baghbani ki
juun nigah dil gaya hai a.ankhon ki raah
garche ham ne nigahbani ki
kis ke haan tum karam nahin karte
kabhu idhar na mehrbani ki
apne nazdik dard-e-dil main kaha
tere nazdik qissa-ḳhvani ki
harza-goi se mujh ko di hai najat
haigi minnat ye be-zabani ki
nahin taqat ki dam nikal sakun
ab ye naubat hai na-tavani ki
‘asar’ is haal pe bhi jiita hai
kya kahun us ki saḳht-jani ki
Leave a Reply