be-ḳhabar duniya ko rahne do ḳhabar karte ho kyuun
dosto mere dukhon ko mushtahar karte ho kyuun
koi darvaza na kholega sada-e-dard par
bastiyon men shor-o-ghul shaam o sahar karte ho kyuun
mujh se ghurbat mol le kar kaun ghar le ja.ega
tum mujhe rusva sar-e-bazar-e-zar karte ho kyuun
aankh ke andhon ko kyuun dikhlate ho parvaz-e-harf
kaghazon pe ab tamasha-e-hunar karte ho kyuun
tazkira likhte ho kya meri shikast-o-reḳht ka
lafz ki basti men ma.ani ko khanDar karte ho kyuun
dosto! bina.i baḳhshegi tumhen un ki uḌaan
panchhiyon ko chhoḌ do be-bal-o-par karte ho kyuun
lafz agar bote to phir fasl-e-ma.ani kaTte
dosto! ab shikva-e-ahl-e-hunar karte ho kyuun
zalimon ke saath mil jaao rahoge aish men
umr ‘sajid’ kasmapursi men basar karte ho kyuun
Leave a Reply