Na-Tawani Mein Palak Ko Bhi Hilaya Na Gaya

na-tavani men palak ko bhi hilaya na gaya

dekh ke un ko ishare se bulaya na gaya

saḳht-tar sang se bhi dil hai unhon ka shayad

naqsh jis par kisi unvan bithaya na gaya

gulshan-e-ḳhuld men har-chand ki dil bahlaya

kucha-e-yar magar dil se bhulaya na gaya

shikan-e-zulf se dil saaf nazar aata hai

is andhere men taajjub hai chhupaya na gaya

dekh kar kal vo mira hal-e-pareshan ‘arif’

aisa ghabrae ki ankhon ko churaya na gaya

Leave a Comment