Momin Khan Momin
mahshar men paas kyuun dam-e-fariyad aa gaya
rahm us ne kab kiya tha ki ab yaad aa gaya
uljha hai paanv yaar ka zulf-e-daraz men
lo aap apne daam men sayyad aa gaya
nakamiyon men tum ne jo tashbih mujh se di
shirin ko dard-e-talkhi-e-farhad aa gaya
ham charagar ko yuun hi pahnaenge bediyan
qaabu men apne gar vo pari-zad aa gaya
dil ko qalaq hai tark-e-mohabbat ke baad bhi
ab asman ko shikva-e-bedad aa gaya
vo bad-guman hua jo kahin sher men mire
zikr-e-butan-e-khalkh-o-naushad aa gaya
the be-gunah jurat-e-pa-bos thi zarur
kya karte vahm-e-khajlat-e-jallad aa gaya
jo ho chuka yaqin ki nahin taqat-e-visal
dam men hamare vo sitam-ijad aa gaya
zikr-e-sharab-o-hur kalam-e-khuda men dekh
‘momin’ main kya kahun mujhe kya yaad aa gaya
Leave a Reply