lutf men vaan dhang hai bedad ka
kaam de ai khamushi fariyad ka
kyuun ki le tasvir us ki dekhiye
haath qaabu men nahin bahzad ka
umr-bhar rakhta hai paband-e-kamin
said khud ik daam hai sayyad ka
daava-e-batil ki pursish rah gai
kaun pursan hasrat-e-shaddad ka
duur tak apni nigahen hain rasa
parda haail gar na ho ijad ka
kaun yaan qaid-e-taalluq men nahin
pa-ba-gul hai sarv se azad ka
dil men jab aae ki us ne sun liya
na-rasa kyuun naam hai fariyad ka
aap hi gardish se hai majbur-e-charkh
chahna aise se kya imdad ka
dekhiye kasrat se vahdat ko to hai
ek jalva mujid-o-ijad ka
kohkan ne umr-bhar kaata pahad
main huun juuya charkh ki buniyad ka
bach gaya tir-e-nigah-e-yar se
vaqai aina hai faulad ka
bhula hai din-o-duniya aadmi
khassa hai ye buton ki yaad ka
pahle nafgh-e-sur se aa jaun yaan
shak na ho tum ko miri fariyad ka
zarbat-e-tesha thi patthar ki lakir
naam mitta hi nahin farhad ka
khud uda jaata huun ‘salik’ zoaf se
aah men tufan hai qaum-e-ad ka