Kaashif Shakiil
ho ga.e ham jahan se begane
vahshaton aur ghamon ke divane
ab hamari koi talab hi nahin
haal apna to bas ḳhuda jaane
nekiyan nama-e-siyah men hain
jaise naali men kuchh guhar daane
doston se vafa ki aas kahan
ham to chit ho ga.e sabhi ḳhane
tum nazar hi se kah ga.e hote
lafz se mavara hain parvane
aao pi kar ke hao-hu hi karen
koi masjid nahin hain maiḳhane
shaiḳh ne ishq kar diya jaa.ez
pa ga.e jab dilon ke nazrane
ai na.i nasl tum hi kaam karo
ham sabhi ho ga.e hain afsane
‘kashif’ ab ishq men hi jannat hai
koi maane ya phir nahin maane
Leave a Reply